 |
| ရှားပါးကြယ်လိပ် |
မြန်မာကြယ်လိပ်အကြောင်း
မြန်မာ့ကြယ်လိပ်ကို သိပ္ပံအမည် (Geochelone Platynota) မျိုးရင်း (Testudinidae) အများသုံး အမည် (Myanmar Star Tortoise) ဒေသသုံးအမည် ကြယ်လိပ်၊ ပင့်ကူလိပ်၊ ပြိုလ်လိပ်၊ မြလိပ်၊ တောင်ပုလိပ်၊ မန်းကျည်းလိပ် အဖြစ် လူသိများသည်။
မြန်မာ့ကြယ်လိပ်ကို မြန်မာနိုင်ငံတွင်သာ တွေ့ရှိရပြီး အခြားနိုင်ငံ များတွင်မတွေ့ရပါ။ မြန်မာ့ဒေသရင်း မျိုးစိတ်ဖြစ်သည်။ မြန်မာနိုင်ငံအတွင်း ခြောက်သွေ့ပူပြင်းသော အလယ်ပိုင်းဒေသများတွင် တွေ့ရပြီး မန္တလေးတိုင်းဒေသကြီး၊ စစ်ကိုင်းတိုင်းဒေသကြီး၊ မကွေးတိုင်းဒေသကြီးတို့တွင် အတွေ့များသည်။ နွားထိုးကြီးမြို့နယ်၊ မင်းစုံတောင်ဘေးမဲ့တောတွင် ခြံခတ် မွေးမြူထိန်းသိမ်းစောင့်ရှောက် လျက်ရှိသည်။ ၄င်းကြယ်လိပ်သည် ကမ္ဘာပေါ်တွင် မျိုးတုံးပျောက်ကွယ်လုနီးသော မျိုးစိတ်ဖြစ်သည်။ ကမ္ဘာပေါ်ရှိ လိပ်မျိုးစိတ်များအနက် နံပါတ်သုံးအဆင့် မျိုးတုံးလုနီးသော မျိုးစိတ်လည်းဖြစ်သည်။ ယင်းမျိုးတုံး ပျောက်ကွယ်လုနီးသော မြန်မာ့ကြယ်လိပ်ကို နွားထိုးကြီးမြို့နယ် မင်းစုံတောင်တောဝင်း တိရစ္ဆာန် ဘေးမဲ့တောတွင် သဘာဝအလျောက် တွေ့ရှိနိုင်ခြင်း၊ ဧက ၅၅၈၄ ကျယ်ဝန်းသော မင်းစုံတောင်တောဝိုင်း တိရစ္ဆာန်ဘေးမဲ့တော တည်ရှိနေခြင်းတို့ကြောင့် နွားထိုးကြီးမြို့နယ်၏ ဂုဏ်ကျက်သရေဆောင်တစ်ခုဖြစ်သည်။ ကမ္ဘာပေါ်တွင် လိပ်သီးသန့် ထိန်းသိမ်းရေးနယ်မြေအဖြစ် မင်းစုံတောင်တောဝိုင်း တိရစ္ဆာန်ဘေးမဲ့တောသည် အကျယ်ဝန်းဆုံး ဧရိယာဖြစ်ပါသည်။
မြန်မာကြယ်လိပ်သည် စက်တင်ဘာလ၊ အောက်တိုဘာလများတွင် ဥဥပြီး ဇွန်လ၊ ဇူလိုင်လများတွင် သားပေါက်လေ့ရှိသည်။ တစ်နှစ်လျှင် နှစ်ကြိမ်ဥလေ့ရှိပြီး တစ်ကြိမ်လျှင် ဥသုံးလုံးမှကိုးလုံးအထိဥသည်။ သားပေါက်သည့် ရာသီတွင်ပင် မိတ်လိုက်လေ့ရှိသည်။ မျိုးတုံးပျောက်ကွယ်လုနီးပါး ဖြစ်သည့်အလျောက် မင်းစုံ တောင်တောဝင်း တိရစ္ဆာန်ဘေးမဲ့တော၊ ရှောက်တောရိုးစခန်းတွင် ခြံခတ်မွေးမြူထားခြင်းအားဖြင့် အများပြည်သူများ လာရောက်ကြည့်ရှုလေ့လာနိုင်ခြင်း၊ သိပ္ပံပညာရပ်ဆိုင်ရာ လေ့လာသုတေသန ပြုလုပ်နိုင်ခြင်း၊ ခြံခတ်မွေးမြူထား၍ ၄င်းတို့၏ အလေ့အထသဘာဝကို သိရှိသည့်အပြင် မည်ကဲ့သို့ ထိန်းသိမ်းနိုင်ကြောင်း သိရှိခြင်း၊ မျိုးတုံးရန်အန္တရာယ်မှကာကွယ်နိုင်ခြင်းစသည့် အကျိုးကျေးဇူးတို့ကို ရရှိနိုင်သည့်အပြင် သဘာဝအခြေခံခရီးသွားလုပ်ငန်းအတွက်လည်း အကျိုးရှိစေသည်။
မြန်မာ့ကြယ်လိပ်သည် မျိုးတုံးရန်အလွန်နီးစပ်နေသော မျိုးစိတ်ဖြစ်သည့်အလျောက် လုံးဝကာကွယ် ထားသော တိရစ္ဆာန်ဖြစ်သည့်အပြင် ကမ္ဘာပေါ်တွင် လိပ်သီးသန့် ထိန်းသိမ်းရေးနယ်မြေအဖြစ် နွားထိုးကြီးမြို့နယ်၊ မင်းစုံတောင်တောဝိုင်း တိရစ္ဆာန်ဘေးမဲ့တောသည် အကျယ်ဝန်းဆုံး ဧရိယာအဖြစ်ထိန်းသိမ်း ဆောင်ရွက်လျက်ရှိသည်။
ဆက်စပ်သတင်း
မြန်မာ့ကြယ်လိပ်အကောင် ၁၅ဝ ဘေးမဲ့လွှတ်ပွဲအခမ်းအနားကို ပတ်ဝန်းကျင်ထိန်းသိမ်းရေးနှင့် သစ်တောဝန်ကြီးဌာန ဘာဝပတ်ဝန်းကျင်နှင့်
သားငှက်တိရစ္ဆာန်ထိန်းသိမ်းရေးဌာန လက်အောက်ရှိ မင်းစုံတောင်တောရိုင်း တိရစ္ဆာန်ဘေးမဲ့တောအတွင်းရှိ မင်းစုံ တောင်ပေါ် ဘုန်းပွင့်အောင် စေတီ ခြေရင်းရှိ ပရိဝုဏ်၌ နိုဝင်ဘာ ၆ ရက်က စည်ကားသိုက်မြိုက်စွာ ကျင်းပခဲ့ကြောင်း သိရသည်။
အဆိုပါအခမ်းအနားတွင် မင်းစုံ တောင်အုပ်ချုပ်ရေးမှူး ဦးစီးအရာရှိ ဦးစန်းဝင်း၊ မြို့နယ်အထွေထွေအုပ်ချုပ် ရေးမှူး ဦးကျော်နိုင်၊ မြို့နယ်ပညာရေးမှူးဒေါက်တာ ဒေါ်သန္တာဆွေ၊ ရတနာ ပုံတိရစ္ဆာန်ဥယျာဉ်မှ ဒေါက်တာတင့်လွင်၊ တွားသွားသုတေသနပညာရှင် ဒေါက်တာစတီဗင်ပလတ်၊
ဒေါက်တာဒေါ်ကလျာတို့က ရည်ရွယ်ချက်နှင့် သိမှတ်ဖွယ်ရာများကို ပြော
ကြားခဲ့သည်။
အခမ်းအနားအပြီးတွင် မြန်မာ့အမွေအနှစ်တွင်ပါဝင်၍ ကျန်းမာ ရေးစစ်ဆေးပြီးဖြစ်သော မြန်မာ့ဌာနေ ရင်းဖွား ကြယ်လိပ် Geochelone
platynota ခြံပေါက်အရွယ်ရောက် အကောင် ၁၅ဝ ကို ဘေးမဲ့တောအတွင်းရှိ နေရာသုံးနေရာတွင် လွှတ်ပေးခဲ့သည်။ ယင်းကြယ်လိပ်များသည် သစ်တောဥပဒေဖြင့်ကာကွယ်ထား သော မျိုးစိတ်ဖြစ်သကဲ့သို့ ကမ္ဘာ့မျိုး သုဉ်းပျောက်ကွယ်မည့် လိပ်မျိုးစိတ် ၂၅ မျိုးတွင်ပါဝင်သဖြင့် လုံးဝ ကာကွယ်ထားသော မျိုးစိတ်ဖြစ်ကာ သစ်တောဦးစီးဌာန အောက်ရှိ ရွှေစက်တော်ဘေးမဲ့တော၊ လောက နန္ဒာဘေးမဲ့တောဥယျာဉ်နှင့် မင်းစုံ တောင်ဘေးမဲ့တောတို့တွင် အနီးကပ် ကာကွယ်ထိန်းသိမ်းမွေးမြူစောင့် ရှောက်လျက်ရှိသော မျိုးစိတ်လည်း ဖြစ်သည်။
ကိုငြိမ်း (တောင်သာ)
၁၂-၁၁-၂၀၁၃ ရက်နေ့ထုတ် ကြေးမုံသတင်းစာ စာမျက်နှာ(၂)မှ
၁၂-၁၁-၂၀၁၃ ရက်နေ့ထုတ် ကြေးမုံသတင်းစာ စာမျက်နှာ(၂)မှ
No comments:
Post a Comment
အကြံပြုချက်တစ်ခုခု ရေးခဲ့ပါ....